मधेश प्रदेशमा सरकारी कर्मचारीको तलब १० प्रतिशतले बढ्यो, थप १० प्रतिशत प्रोत्साहन भत्ता

काठमाण्डौ । मधेश प्रदेश सरकारले आगामी आर्थिक वर्ष २०८३/८४ का लागि ल्याएको बजेटमार्फत प्रदेशका सरकारी कर्मचारीहरूको तलब तथा सुविधामा वृद्धि गर्ने घोषणा गरेको छ।

सोमबार प्रदेश सभामा बजेट प्रस्तुत गर्दै अर्थमन्त्री युवराज भट्टराईले कर्मचारीको तलबमा १० प्रतिशत वृद्धि गरिने जानकारी दिएका हुन्।

अर्थमन्त्री भट्टराईका अनुसार कर्मचारीको मनोबल उच्च बनाउने, सेवा प्रवाहलाई थप प्रभावकारी बनाउने तथा कार्यसम्पादनमा आधारित प्रशासनिक संस्कृतिलाई प्रोत्साहन गर्ने उद्देश्यले तलब वृद्धिको व्यवस्था गरिएको हो।

तलब वृद्धिसँगै कर्मचारीको कार्यसम्पादन मूल्यांकनका आधारमा थप १० प्रतिशत प्रोत्साहन भत्ता उपलब्ध गराइने व्यवस्था पनि बजेटमा समेटिएको छ।

प्रदेश सरकारले कार्यसम्पादनमा आधारित प्रोत्साहन प्रणाली लागू गरेर जिम्मेवारी र नतिजामुखी कार्यशैलीलाई बढावा दिन खोजेको जनाएको छ।

यस व्यवस्थाबाट कर्मचारीहरूलाई सेवाप्रति थप उत्तरदायी र परिणाममुखी बनाउन सहयोग पुग्ने अपेक्षा गरिएको छ।

बजेट भाषणका क्रममा अर्थमन्त्री भट्टराईले प्रदेश सरकार सुशासन, सेवा प्रवाह सुधार र प्रशासनिक दक्षता अभिवृद्धिमा केन्द्रित रहेको उल्लेख गर्दै कर्मचारीको क्षमता र उत्पादकत्व बढाउन विभिन्न कार्यक्रमसमेत सञ्चालन गरिने बताए।

तलब वृद्धि र प्रोत्साहन भत्ताको व्यवस्थाले प्रदेश सरकारको चालु खर्चमा थप भार पर्ने भएपनि सार्वजनिक सेवाको गुणस्तर सुधार तथा कर्मचारीको कार्यसम्पादनमा सकारात्मक प्रभाव पर्ने विश्वास प्रदेश सरकारले लिएको छ।