सस्तो सेयरभाउ भएका तीन विकास बैंक, लगानीका लागि कति उचित ?

काठमाण्डौ । नेप्सेमा सूचीकृत विकास बैंकहरुमध्ये तीनवटा बैंकको सेयरभाउ चार सय रुपैयाँभन्दा कम छ । मुक्तिनाथ विकास बैंक, महालक्ष्मी विकास बैंक र ज्योति विकास बैंकको सेयरभाउ अन्य बैंकहरुको तुलनामा सस्तो छ ।  

नेप्सेमा अहिले लो क्याप भएका कम्पनीहरु चलेका छन् । सूचीकृत कम्पनीहरुमध्ये पुँजी कम भएका कम्पनीको सेयरभाउ धेरै र पुँजी धेरै भएका कम्पनीको सेयरभाउ सस्तो भएको छ ।  

नेप्सेमा अहिले १५ वटा विकास बैंक सूचीकृत छन् । यसअघि १६ वटा विकास बैंक सूचीकृत रहेकोमा कर्णाली डेभलपमेन्ट बैंकको सूचीकरण खारेज भइसकेको छ । कर्णाली डेभलपमेन्ट बैंकको फन्डापछि यतिबेला सेयरबजारमा विकास बैंकको निकै चर्चा छ ।  

प्रायजसो सेयरभाउ धेरै तर पुँजी कम भएका विकास बैंकहरुको वित्तीय अवस्था खासै सन्तोषजनक छैन । हाई क्याप भएका विकास बैंकहरुको वित्तीय अवस्था राम्रो भएतापनि बजारमा यी कम्पनीहरुको चर्चा त्यति देखिँदैन ।  

बजारमा हाई क्याप भएका कम्पनीहरु नचलेको अवस्थामा अहिले आधारभुत पक्षबाट बलिया र राम्रा कम्पनीहरु ओझेलमा पर्ने गरेको देखिन्छ । राम्रा मानिने कम्पनीहरुकै सेयरभाउ २–३ सयको हाराहारीमा छन् । उदाहरणकै लागि अहिले अधिकांश कमर्सियल बैंकहरुको सेयरभाउ २–३ सयको हाराहारीमा छ ।  

लो क्याप भएका विकास बैंकहरुमध्ये अहिले ग्रीन डेभलपमेन्ट बैंक, सप्तकोशी डेभलपमेन्ट बैंक र कर्पोरेट डेभलपमेन्ट बैंकको सेयरभाउ सबैभन्दा बढी छ । ग्रीन डेभलपमेन्टको १०८५ रुपैयाँ, सप्तकोशीको १०५० रुपैयाँ र कर्पोरेटको १७३५ रुपैयाँ छ । जहाँ ग्रीन डेभलपमेन्ट बैंकको पुँजी जम्मा ५३ करोड ८७ लाख, सप्तकोशीको पुँजी ८३ करोड ४३ लाख रुपैयाँ र  कर्पोरेटको पुँजी ५२ करोड ५० लाख रुपैयाँ छ ।

तर यता पुँजी धेरै भएका तीनवटा विकास बैंकको सेयरभाउ भने घटेर चारसय रुपैयाँ भन्दा तल झरिसकेको छ । यी कम्पनीहरुको वित्तीय अवस्था अन्य कम्पनीको तुलनामा सन्तोषजनक नै देखिन्छन् ।  

महालक्ष्मी विकास बैंकको पुँजी ४ अर्ब २९ करोड, मुक्तिनाथ विकास बैंकको ७ अर्ब ४ करोड रुपैयाँ र ज्योति विकास बैंकको पुँजी ४ अर्ब ३९ करोड रुपैयाँ छ ।  

अहिले बजारमा लो क्याप कम्पनीहरु चलिरहेको अवस्था छ । तर लगानीकर्ताले दीर्घकालिन लगानीलाई हेर्ने हो भने हाई क्याप भएका वा आधारभुत पक्षमा बलिया कम्पनी नै छान्दा उचित हुन सक्छ । यी तीनवटा बैंकको सेयरभाउ सस्तिएपनि आधारभुत पक्ष राम्रै देखिन्छ ।  

कम्पनीहरुले कमाउने नाफा, कम्पनीको व्यवसाय र लगानीकर्तालाई वितरण गर्न छुट्याएको मुनाफा लगानीकर्ताको लागि महत्वपूर्ण सूचक हो । यसर्थमा महालक्ष्मी, मुक्तिनाथ र ज्योति विकास बैंकको व्यवसाय, मुनाफा, प्रतिसेयर आम्दानी, नेटवर्थ र वितरणयोग्य मुनाफा सन्तोषजनक नै देखिन्छ ।  

सरकारले हाई क्याप भएका कम्पनीहरुसमेत चल्ने गरी पुँजीबजार सुधारका लागि पोलिसी ल्याएमा यस्ता कम्पनीमा लगानी गर्दा उत्कृष्ट रिटर्न पाउन सक्ने देखिन्छ । हाई क्याप भएका कम्पनीको सेयरभाउ सस्तिँदै जाँनु लगानीको लागि वातावरण सिर्जना हुनु हो ।  

चालु आवको पहिलो त्रैमाससम्म महालक्ष्मी विकास बैंकले ९ करोड ४२ लाख, मुक्तिनाथ विकास बैंकले २८ करोड १८ लाख रुपैयाँ र ज्योति विकास बैंकले १५ करोड ११ लाख रुपैयाँ नाफा कमाएका छन् ।