फाइनान्स कम्पनीहरुको नाफामा देखियो सुधार, सबैभन्दा धेरै कमाउनेमा आइसीएफसी

काठमाण्डौ । फाइनान्स कम्पनीहरुको नाफामा सुधार देखिएको छ । नेपाल राष्ट्र बैंकका अनुसार चालु आवको १० महिनासम्ममा फाइनान्स कम्पनीहरुले १३ करोड ९९ लाख रुपैयाँ नाफा कमाएका छन् ।  

गत आवको सोही अवधिसम्म भने फाइनान्स कम्पनीहरुले समग्रमा ३१ करोड ३७ लाख रुपैयाँ घाटा ब्यहोरेका थिए । गत आवको वैशाख मसान्तसम्म ८ वटा फाइनान्स कम्पनी घाटामा थिए भने यस अवधिसम्म आइपुग्दा ५ वटा कम्पनी मात्रै घाटामा छन् ।  

साथै, नाफामा भएका कम्पनीको समेत गत आवको तुलनामा नाफा उल्लेख्य बढेको छ । यसकारण पनि फाइनान्सहरुको नाफाम सुधार देखिएको हो ।  

सो अवधिसम्म सबैभन्दा बढी नाफा कमाउनेमा आइसीएफसी फाइनान्स रहेको छ । कम्पनीले २१ करोड ५७ लाख रुपैयाँ नाफा कमाएको छ । यो नाफा गत आवको तुलनामा ३४०.३८ प्रतिशत बढी हो ।  

त्यस्तै, मन्जुश्री फाइनान्सले २० करोड ६२ लाख, प्रोग्रेसिभ फाइनान्सले ८ करोड ७५ लाख, गुहेश्वरी मर्चेन्ट बैंक एण्ड फाइनान्सले ४ करोड ९२ लाख, श्री इन्भेष्टमेन्ट एण्ड फाइनान्सले ३ करोड ७९ लाख, सेन्ट्रल फाइनान्सले ३ करोड ६ लाख, मल्टीपर्पस फाइनान्सले २ करोड ४३ लाख, नेपाल फाइनान्सले १ करोड ५८ लाख, गुडवील फाइनान्सले १ करोड ३९ लाख र गोर्खाज फाइनान्सले ६७ लाख रुपैयाँ नाफा कमाएका छन् ।  

त्यस्तै, सबैभन्दा बढी घाटा ब्यहोर्नेमा भने रिलायन्स फाइनान्स रहेको छ । फाइनान्सले सो अवधिसम्म २१ करोड १ लाख रुपैयाँ घाटा ब्यहोरेको छ ।  

यता जानकी फाइनान्सले ११ करोड २७ लाख, पोखरा फाइनान्सले ८ करोड ४३ लाख, समृद्धि फाइनान्सले ७ करोड ८ लाख रुपैयाँ र बेष्ट फाइनान्सले ६ करोड ९९ लाख रुपैयाँ घाटा ब्यहोरेको छ ।