लोयड्स बैंकिङ ग्रुपले थप १३६ वटा शाखा कार्यालयहरु बन्द गर्ने, यस्तो छ कारण

काठमाण्डौ । बेलायतको लोयड्स बैंकिङ ग्रुपले थप १३६ वटा शाखा कार्यालयहरु बन्द गर्ने भएको छ । जसअन्तर्गत लोयड्सका ६१ शाखा, हेलिफ्याक्सका ६१ र बैंक अफ स्कटल्याण्डका १४ शाखा कार्यालयहरु बन्द हुनेछन् ।  

यी शाखा कार्यालयहरु मे २०२५ र मार्च २०२६ का बीच बन्द हुनेछन् । लोयड्स बैंकिङ ग्रुपले केही समयअघि तीनवटै बैंकका गा्रहकहरुलाई व्यक्तिगत बैंकिङका लागि आफ्ना ब्राण्डहरुका जुनसुकै शाखाहरु प्रयोग गर्न पाउने निर्णय गरेसँगै १३६ शाखा कार्यालय बन्द गर्ने निर्णय आएको हो ।  

शाखा कार्यालय कटौतीको योजना पूरा भएसँगै लोयड्सको शाखा कार्यालयको संख्या ३८६,हेलिफाक्सको २८१ र बैंकको स्कटल्याण्डको ९० शाखामा सीमित हुनेछ ।  

भौतिक रुपमा बैंक गएर कारोबार गर्नुको साटो ग्राहकहरुले मोबाइल बैंकिङलाई रोजिरहेकाले ठूलो संख्यामा शाखा कार्यालय कटौतीको योजना बनाएको लोयड् बैंकिङ ग्रुपले जनाएको छ । यो निर्णयबाट प्रभावित हुने बैंकका कर्मचारीहरुलाई संस्थाको अन्य पदमा जिम्मेवारी दिइने कम्पनीले जनाएको छ ।  

बैंकले बन्द गर्ने निर्णय भएका यी शाखाहरुमा पछिल्लो ५ वर्षको अवधिमा औषतमा ४८ प्रतिशतले कारोबार घटेको जनाएकमो छ । ग्राहकहरुले एपमा आधारित भुक्तानीलाई बढी रुचाएका कारण शाखामार्फत हुने कारोबारमा कमी आएको बैंकले जनाएको छ ।  

लोयड्का प्रवक्ताले २ करोड भन्दा बढी गा्रहकहरुले मोबाइल बैंकिङ एप प्रयोग गरिरहेको बताएका छन् । यसका साथै ग्राहकहरुले टेलिफोन बैंकिङ,कम्युनिटी बैंकर र ३ वटै बैंकका जुनसुकै शाखाहरु प्रयोग गरिरहेको बताएका छन् ।  

कम्पनीले हालै मात्रै डनफरम्लाइन,स्कटल्याण्ड र लिभरपुलस्थित कार्यालयहरु बन्द गर्ने निर्णय गरेको थियो । जसका कारण १ हजार बढी कर्मचारी प्रभावित हुने जनाइएको छ ।