निजामतीमा ‘क्लिन स्वीप’को संकेत, रास्वपा एक्शनमा

काठमाण्डौ । सत्तारुढ दल राष्ट्रिय स्वतन्त्र पार्टी ले निजामती प्रशासनभित्र सक्रिय दलगत समूह, अभियान र युनियन शैलीका संरचनाविरुद्ध कडा कदम चाल्ने संकेत दिएको छ ।

पार्टीका महामन्त्री कविन्द्र बुर्लाकोटी ले जारी गरेको विज्ञप्तिमा निजामती सेवाभित्र देखिएका दलगत अभ्यास र संगठनहरूलाई अस्वीकार्य भन्दै यस्ता संरचना खारेज गर्ने दिशामा पार्टी अघि बढ्ने स्पष्ट सन्देश दिएका छन् ।

पछिल्लो समय विभिन्न नाममा समूह गठन गरी पार्टी र नेतृत्वको नाम जोडेर प्रभाव जमाउने प्रयास भइरहेको भन्दै रास्वपाले यस्तो गतिविधिलाई ‘भ्रम फैलाउने र स्वार्थप्रेरित खेल’ को संज्ञा दिएको छ । पार्टीले यस्ता कुनै पनि समूहसँग आफ्नो कुनै सम्बन्ध नरहेको मात्र नभई यस्ता प्रवृत्तिलाई अन्त्य गर्नुपर्नेमा जोड दिएको छ ।

रास्वपाले सार्वजनिक प्रशासनलाई पूर्ण रूपमा राजनीतिक प्रभावबाट मुक्त गर्दै ‘मेरिटोक्रेसी’ अर्थात् योग्यता प्रणालीमा आधारित बनाउने आफ्नो मूल एजेन्डा दोहोर्याएको छ । “कर्मचारीको एउटै धर्म जनसेवा र एउटै पहिचान व्यावसायिकता हुनुपर्छ,” भन्दै पार्टीले दलीय आडमा चल्ने प्रशासनिक संरचना अब स्वीकार्य नहुने स्पष्ट संकेत गरेको छ ।

विज्ञप्तिमा विगतमा देखिएको डर, दबाब र राजनीतिक छायाँमा काम गर्ने संस्कृतिको अन्त्य गर्ने उल्लेख गर्दै निजामती सेवाभित्र रहेका दलगत संगठनहरू एकैपटक हटाउने वातावरणतर्फ आफूहरू अग्रसर हुने सन्देश दिइएको छ ।

रास्वपाले सम्पूर्ण राष्ट्रसेवक कर्मचारीलाई कुनै पनि दल वा समूहको प्रभावबाट टाढा रही निष्पक्ष र जिम्मेवार ढंगले जनताको सेवामा केन्द्रित हुन आग्रह गरेको छ ।