आगामी ५ वर्षभित्र आर्थिक वृद्धिदर ७ प्रतिशत बढाउने सरकारको प्रतिबद्धता, गरिबी दर १०% मा झार्ने

काठमाण्डौ । सरकारले आगामी ५ वर्षमा औसत आर्थिक वृद्धिदर ७ प्रतिशत हासिल गरी प्रतिव्यक्ति आय ३ हजार डलर बनाउने प्रतिबद्धता व्यक्त गरेको छ ।  

६ राष्ट्रिय राजनीतिक दलका घोषणापत्रहरुलाई समेटर सार्वजनिक गरेको १८ बुँदे ‘राष्ट्रिय प्रतिबद्धतापत्र’को मस्यौदामा सरकारले नेपालको कुल ग्राहस्थ उत्पादन (जीडीपी) १०० अर्ब डलर नजिक पुर्याउने उल्लेख गरेको छ ।  

सरकारले आर्थिक रुपान्तरणको लागि निश्चित समयसम्म आर्थिक एजेण्डामा प्रमुख राजनीतिक दलहरुबीच राष्ट्रिय सहमति कायम गरी राष्ट्रिय पूँजी निर्माण, रोजगारी सिर्जना, निर्यात वृद्धि र समष्टिगत आर्थिक स्थायित्वका राष्ट्रिय तथा क्षेत्रगत नीति तर्जुमा तथा कार्यान्वयन गरी नेपाललाई सम्मानजनक मध्यम आय भएको मुलुकको रुपमा स्थापित गर्ने प्रतिबद्धता गरेको छ ।  

त्यस्तै, निजी, सहकारी र सार्वजनिक क्षेत्रबीच सन्तुलित र पूरक विकासको मोडलमार्फत आर्थिक तथा सामाजिक असमानता न्यूनीकरण गरी पाँच वर्षमा बहुआयामिक गरिबीको दर १० प्रतिशतमा झार्ने समेत सरकारले प्रतिबद्धतापत्रमा उल्लेख गरेको छ ।