पश्चिमी प्रणाली सक्रिय, शनिबार पनि वर्षा र हिमपातको सम्भावना

काठमाण्डौं । नेपालमा अहिले उपल्लो वायुमण्डलीय पश्चिमी न्यूनचापीय प्रणाली, स्थानीय वायु तथा पश्चिमदेखि पूर्वसम्म नेपाल आसपास फैलिएको न्यूनचापीय रेखाको संयुक्त प्रभाव कायम रहेको छ ।  

यस मौसमी अवस्थाका कारण देशका विभिन्न भागमा बदली, वर्षा र हावाहुरीको प्रभाव देखिएको छ ।

हाल कोशी, मधेश, बागमती र गण्डकी प्रदेशमा मौसम पूर्णतया बदली रहेको छ भने लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा आंशिकदेखि सामान्य बदली देखिएको मौसम पूर्वानुमान महाशाखाले जनाएको छ ।  

तराईका अन्य क्षेत्रमा आंशिक बदलीको अवस्था रहेको छ । कोशी, लुम्बिनी, कर्णाली र सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ ।

महाशाखाका अनुसार शनिबार दिउँसो देशभर सामान्यदेखि पूर्ण बदली रहने सम्भावना छ ।  

लुम्बिनी, कर्णाली, सुदूरपश्चिम, कोशी, बागमती र गण्डकी प्रदेशका पहाडी तथा हिमाली क्षेत्रका केही स्थानमा मेघगर्जन, चट्याङसहित मध्यम वर्षा हुनसक्ने अनुमान गरिएको छ ।  

साथै मधेश प्रदेशसहित कोशी, बागमती, गण्डकी, लुम्बिनी र सुदूरपश्चिमका तराई क्षेत्रका केही स्थानमा पनि वर्षाको सम्भावना रहेको छ ।

उच्च हिमाली क्षेत्रमा हल्का हिमपात हुन सक्ने पूर्वानुमान गरिएको छ ।  

मौसमविद्का अनुसार देशका केही तराई तथा पहाडी क्षेत्रमा हावाहुरी चल्ने सम्भावना पनि रहेकाले आवश्यक सतर्कता अपनाउन आग्रह गरिएको छ ।

आज राति पनि सुदूरपश्चिम प्रदेशसहित देशका पहाडी र हिमाली भू-भागमा सामान्य बदली कायम रहनेछ भने बाँकी क्षेत्रमा आंशिक बदली रहने महाशाखाले जनाएको छ ।  

सुदूरपश्चिम, कर्णाली र गण्डकी प्रदेशका पहाडी तथा हिमाली क्षेत्रका थोरै स्थानमा तथा कोशी, बागमती र लुम्बिनी प्रदेशका हिमाली क्षेत्रका एक/दुई स्थानमा हल्का वर्षा तथा हिमपातको सम्भावना रहेको छ ।