प्रभू बैंकका सीईओ अशोक शेरचन लगायतलाई थप ५ दिन हिरासतमा राख्न अदालतको अनुमति

काठमाण्डौ । काठमाडौंस्थित उच्च अदालत पाटनले प्रभु बैंकका प्रमुख कार्यकारी अधिकृत अशोक शेरचनसँगै अन्य चार जना व्यक्तिहरूमाथि छानबिन प्रक्रिया अघि बढाउन अतिरिक्त पाँच दिनको समयावधि स्वीकृत गरेको छ।

यो निर्णय अनुसार डेपुटी सीईओ मणिराज पोखरेल, प्रमुख कर्जा अधिकृत रिवास श्रेष्ठ, बैंकका सुजिन शाक्य र गुण ग्रुपका अध्यक्ष राजेन्द्र शाक्यलाई थप अनुसन्धानका लागि हिरासतमा राख्न अनुमति प्राप्त भएको अदालतकी सूचना अधिकारी पार्वती हितानले बताएकी छिन्।

न्यायाधीश चन्द्रबहादुर सारु तथा गिता प्रसाद तिम्सिनाको संयुक्त इजलासबाट यो आदेश जारी भएको हो। साथै, अदालतले विशेष सरकारी वकिलको कार्यालयलाई छानबिनलाई छिटोभन्दा छिटो टुंग्याउन निर्देशन दिँदै आवश्यक जानकारी उपलब्ध गराउनसमेत आग्रह गरेको छ।

यी आरोपीहरू मंसिर १४ गते पक्राउमा परेका थिए। बैंकिङ कसुर तथा अन्य आर्थिक अनियमिततासम्बन्धी आरोपमा उनीहरूमाथि प्रहरीको केन्द्रीय अनुसन्धान ब्यूरो (सीआईबी) ले अनुसन्धान गरिरहेको छ।