इरानको राजधानीमा ठूलो आक्रमणको दाबी

काठमाण्डौ । अमेरिकाका राष्ट्रपति डोनाल्ड ट्रम्पले इरानको राजधानी तेहरानमा भएको एक ठूलो आक्रमणमा इरानका उच्चस्तरीय सैन्य कमाण्डरहरू मारिएको दाबी गरेका छन्। उनले आफ्नो सामाजिक सञ्जाल प्लेटफर्म ट्रुथ सोसलमार्फत यस्तो दाबी गर्दै एक भिडियो क्लिपसमेत सार्वजनिक गरेका छन्, जसमा तीव्र विस्फोट र युद्धक विमानहरूको आवाज सुनिएको बताइएको छ।

यद्यपि, ट्रम्पले उक्त आक्रमण कहिले भएको हो भन्नेबारे स्पष्ट जानकारी दिएका छैनन्। साथै, मारिएका भनिएका “शीर्ष सैन्य नेताहरू” को पहिचानसम्बन्धी कुनै विवरण पनि सार्वजनिक गरिएको छैन। ह्वाइट हाउसले पनि यस विषयमा औपचारिक रूपमा कुनै पुष्टि वा सूची जारी गरेको छैन।

यो दाबी यस्तो समयमा आएको हो जब इरानमाथि सम्भावित अमेरिकी कारबाहीबारे तनाव चुलिएको छ। ट्रम्पले हालै इरानलाई स्ट्रेस अफ हर्मुज खोल्न १० दिने अल्टिमेटम दिएका थिए, जसको समयसीमा सकिन लाग्दा उनले ‘अब ४८ घण्टा मात्र बाँकी’ रहेको चेतावनी दिएका थिए। उक्त जलमार्ग अन्तर्राष्ट्रिय तेल आपूर्तिका लागि अत्यन्त महत्वपूर्ण मानिन्छ।

ट्रम्पले आफ्नो पोस्टमा इरानी सैन्य नेतृत्वमाथि कडा टिप्पणी गर्दै उनीहरूले ‘खराब र अविवेकी नेतृत्व’ दिएको आरोप लगाएका छन्। यदि उनको दाबी सत्य सावित भएमा, फेब्रुअरी २८ देखि सुरु भएको भनिएको द्वन्द्वपछि इरानका लागि यो दोस्रो ठूलो सैन्य क्षति हुन सक्ने आकलन गरिएको छ।

तर, स्वतन्त्र स्रोतहरूबाट अहिलेसम्म यस दाबीको पुष्टि हुन सकेको छैन, जसले घटनाको वास्तविक अवस्था अझै अस्पष्ट बनाएको छ।