अटोमोबाइल आयात ९ अर्ब ६५ करोडले बढ्यो, सरकारलाई २० अर्बभन्दा बढी राजस्व

काठमाडौं । नेपालमा सवारीसाधनको माग पुनः बढ्न थालेको संकेत देखिएको छ ।  

चालु आर्थिक वर्ष २०८२/८३ को पहिलो १० महिनामा वीरगञ्ज नाका हुँदै ३१ अर्ब ३१ करोड रुपैयाँ बराबरका सवारीसाधन तथा तिनका पार्टपुर्जा आयात भएका छन् । यो रकम गत आर्थिक वर्षको सोही अवधिको तुलनामा ९ अर्ब ६५ करोड रुपैयाँले बढी हो ।

वीरगञ्ज भन्सार कार्यालयका अनुसार आयातमा आएको यो वृद्धिले राजस्व संकलनमा पनि उल्लेखनीय योगदान दिएको छ । चालु आवको १० महिनामा काठमाण्डौं । सवारीसाधन र पार्टपुर्जाबाट मात्रै २० अर्ब ५२ करोड रुपैयाँ राजस्व उठेको छ ।

गतवर्ष यही अवधिमा यस्तो राजस्व १६ अर्ब ६४ करोड रुपैयाँमा सीमित थियो ।  

यस आधारमा सवारी क्षेत्रबाट प्राप्त राजस्व करिब ३ अर्ब ८८ करोड रुपैयाँले बढेको देखिन्छ ।

भन्सार कार्यालयका सूचना अधिकारी उदयसिंह विष्टका अनुसार बैंकिङ क्षेत्रमा तरलता सहज हुनु, अटो कर्जाको विस्तार र बजारमा नयाँ मोडलका सवारीसाधन भित्रिनुले आयात बढाउन सहयोग गरेको हो ।

विशेषगरी निजी सवारीसाधन र दुईपाङ्ग्रे सवारीको माग पुनः बढ्न थालेको तथ्यांकले देखाएको छ ।

तथ्यांकअनुसार चालु आवको १० महिनामा १ अर्ब २५ करोड रुपैयाँ बराबरका विभिन्न सवारीसाधन आयात हुँदा त्यसबाट मात्रै ३ अर्ब १७ करोड रुपैयाँ राजस्व संकलन भएको छ । 

यस्तै, ७ अर्ब ३२ करोड रुपैयाँ मूल्य बराबरका ५१ हजार ४२३ वटा ‘अन एसेम्बल्ड’ मोटरसाइकल आयात भएका छन् ।  

यी मोटरसाइकलबाट सरकारले करिब ७ अर्बभन्दा बढी राजस्व प्राप्त गरेको जनाएको छ ।

विश्लेषकहरूका अनुसार सवारीसाधन आयातमा देखिएको वृद्धि अर्थतन्त्रमा उपभोग र लगानी दुवै क्रमशः सुधारतर्फ उन्मुख भएको संकेत हुन सक्छ ।  

पछिल्ला दुई वर्ष आर्थिक सुस्तता, कर्जा विस्तारमा कमी र उपभोक्ताको कमजोर क्रयशक्तिका कारण अटोमोबाइल बजार दबाबमा थियो ।  

तर, अहिले आयात र राजस्व दुवै बढ्नुले बजारमा केही सकारात्मक मनोविज्ञान फर्किएको देखिन्छ ।

यद्यपि सवारीसाधन आयातमा भएको वृद्धिले विदेशी मुद्रा बाहिरिने दबाब पनि बढाउने भएकाले सरकारले राजस्व वृद्धि र आयात व्यवस्थापनबीच सन्तुलन कायम गर्नुपर्ने चुनौती कायमै रहेको अर्थविद्हरू बताउँछन् ।

वीरगञ्ज नाका नेपालकै सबैभन्दा ठूलो व्यापारिक प्रवेशद्वार भएकाले यहाँको सवारी आयात तथ्यांकलाई समग्र अटोमोबाइल बजारको महत्वपूर्ण सूचकका रूपमा हेरिन्छ ।  

पछिल्लो तथ्यांकले भने नेपाली बजारमा सवारी कारोबार पुनः गति लिन थालेको संकेत दिएको छ ।