प्रविधि कम्पनीहरुको नाफा कम्पनीभित्र सीमित नराखी बाड्नुपर्नेमा जोड

काठमाण्डौ । दक्षिण कोरियामा कृत्रिम बुद्धिमत्ता (एआई) प्रविधिको तीव्र विकाससँगै चिप उद्योगले अभूतपूर्व नाफा कमाइरहेको अवस्थामा श्रम तथा सरकारका उच्च तहका अधिकारीहरूले यी नाफाको वितरणबारे नयाँ बहस सुरु गरेका छन्। देशका श्रम मन्त्री किम यङ–हुनले प्रमुख प्रविधि कम्पनीहरू, विशेषगरी सामसुङ इलेक्ट्रोनिक्स र एसके हाइनिक्स जस्ता सेमिकन्डक्टर क्षेत्रमा अग्रणी कम्पनीहरूले एआई बूमका कारण प्राप्त अत्यधिक नाफालाई केवल कम्पनी भित्र सीमित नराखी आपूर्तिकर्ता, उपठेकेदार तथा श्रमिकहरूसम्म पनि बाँड्नुपर्ने सुझाव दिएका छन्।

उनले यी कम्पनीहरूको सफलतामा हजारौँ साना आपूर्तिकर्ता, स्थानीय समुदाय तथा श्रमिकहरूको प्रत्यक्ष योगदान रहेको छ, त्यसैले उनीहरूलाई समेत यस आर्थिक वृद्धिको लाभ मिल्नुपर्ने बताएका छन् ।

किम यङ–हुनले अतिरिक्त नाफा वा अपेक्षाभन्दा बढी कमाइको विषयमा सरकार, व्यवसाय, श्रमिक संघ र आपूर्तिकर्ताबीच सार्वजनिक संवाद आवश्यक रहेको बताएका छन्। 

उनले एआई प्रविधिको विस्तारसँगै चिप उद्योगमा देखिएको नाफा असामान्य रूपमा बढिरहेको र यदि यसको उचित वितरण नहुने हो भने ठूलो कम्पनी र साना आपूर्तिकर्ताबीचको आर्थिक दूरी अझ बढ्ने चेतावनी दिएका छन्। उनका अनुसार आपूर्तिकर्तासँगको सम्झौता मूल्य समायोजन वा प्रतिभा विकासमा लगानी जस्ता उपायमार्फत यो असन्तुलन कम गर्न सकिन्छ।

यो प्रस्ताव दक्षिण कोरियामा बढ्दो असमानताको सन्दर्भमा आएको हो, जहाँ सामसुङ र एसके हाइनिक्स जस्ता कम्पनीहरूले एआई चिपको माग बढेसँगै ऐतिहासिक स्तरको नाफा कमाइरहेका छन्। यसैसँगै ठूला कम्पनी र साना व्यवसायबीचको आय अन्तर पनि बढ्दै गएको सरकारी तथ्यांकहरूले देखाएका छन्। श्रम मन्त्रीले यसलाई दीर्घकालीन आर्थिक वृद्धिका लागि चुनौतीपूर्ण भन्दै चेतावनी दिएका छन्।