एनआईबीएल इक्वीटीको सोलुखुम्बु जलविद्युत् आयोजनामा १५ करोड लगानी, ७५% निर्माण सकियो

काठमाण्डौ । सोलुखुम्बुमा निर्माणाधीन जलविद्युत् आयोजनामा निजी क्षेत्रबाट १५ करोड रुपैयाँ बराबरको लगानी भित्रिएको छ। NIBL Equity Partners ले Gurkhas Himalayan Hydro Limited मा उक्त रकम बराबरको इक्विटी लगानी गरेको हो।

यो लगानी सोलुदुधकुण्ड नगरपालिका, सोलुखुम्बुस्थित ५.८७५ मेगावाट क्षमताको माथिल्लो जुनबेसी खोला जलविद्युत् आयोजनामा केन्द्रित छ। लगानीसम्बन्धी सम्झौता गत मार्च १९ मा सम्पन्न भएको हो।

पिकिङ प्रवाहमा आधारित आयोजना

उक्त आयोजना पिकिङ ‘रन अफ द रिभर’ प्रकारको हो, जसमा पानी अल्प समयका लागि सञ्चय गरेर बढी माग हुने समयमा विद्युत् उत्पादन गरिन्छ।

यस आयोजनाबाट वार्षिक करिब ३५.४३ गिगावाट घण्टा विद्युत् उत्पादन हुने अनुमान गरिएको छ, जसमा झन्डै ३३ प्रतिशत उत्पादन सुक्खा मौसममै हुने अपेक्षा गरिएको छ।

विद्युत् बिक्री सुनिश्चित

आयोजनाले उत्पादन गर्ने सम्पूर्ण विद्युत् नेपाल विद्युत प्राधिकरणसँगको विद्युत् खरिद सम्झौता (पीपीए) मार्फत बिक्री हुने व्यवस्था भइसकेको छ।

उत्पादन भएको विद्युत् ३३ केभी प्रसारण लाइनमार्फत टिङ्ला सबस्टेसनमा जोडिनेछ।

हालसम्म आयोजनाको करिब ७५ प्रतिशत निर्माण कार्य सम्पन्न भइसकेको छ।

व्यावसायिक उत्पादन सन् २०२७ अगस्टबाट सुरु गर्ने लक्ष्य राखिएको कम्पनीले जनाएको छ।

एनआईबिएल इक्विटी पार्टनर्सका प्रमुख कार्यकारी अधिकृत शिवान्तबहादुर पाण्डेले साना जलविद्युत् र स्वच्छ ऊर्जामा केन्द्रित लगानीलाई निरन्तरता दिने रणनीति अनुसार यो लगानी गरिएको बताएका छन्।

त्यस्तै, गुर्खाज हिमालयन हाइड्रोका प्रबन्ध निर्देशक सन्तोष भट्टराईले यो सहकार्यले आयोजना समयमै सम्पन्न गर्न मद्दत पुग्ने र दुर्गम क्षेत्रमा भरपर्दो विद्युत् आपूर्ति विस्तार हुने विश्वास व्यक्त गरेका छन्।