.jpeg)
.png)
काठमाडौं । सरकारले नेपाली ब्राण्डका मदिराको निर्यात प्रवर्द्धनलाई बजेटमार्फत प्राथमिकतामा राख्दै स्वदेशी मदिरा उद्योगलाई अन्तर्राष्ट्रिय बजारमा प्रतिस्पर्धी बनाउने नीति अघि सारेको छ।
अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ को बजेट प्रस्तुत गर्दै नेपाली ब्राण्डका मदिरा उत्पादनलाई निर्यातमुखी बनाउने र त्यसका लागि आवश्यक नीतिगत तथा संरचनागत सहजीकरण गरिने घोषणा गरेका हुन्।
पछिल्ला वर्षहरूमा नेपाली रक्सी तथा बियर उद्योगले आन्तरिक बजारमा मात्र होइन, विदेशमा बसोबास गर्ने नेपाली समुदाय र केही अन्तर्राष्ट्रिय बजारमा समेत उपस्थिति बढाउन थालेका छन्। विशेषगरी खुकुरी रम, नेपाली ह्विस्की तथा विभिन्न क्राफ्ट बियर ब्राण्डले निर्यात सम्भावना देखाउन थालेपछि सरकारले यो क्षेत्रलाई विदेशी मुद्रा आर्जन गर्ने उद्योगका रूपमा अघि बढाउने संकेत दिएको छ।
बजेटमार्फत अर्को महत्वपूर्ण घोषणा माइक्रो ब्रुअरी (Micro Brewery) सम्बन्धी छ। सरकारले यस्ता साना तथा विशेष बियर उत्पादन गर्ने उद्योगलाई औपचारिक रूपमा मदिरा उद्योगमा दर्ता गरी अन्तःशुल्कको दायरामा ल्याउने व्यवस्था गरेको छ।
हाल नेपालका विभिन्न होटल, रिसोर्ट, रेष्टुरेन्ट तथा निजी ब्राण्डमार्फत सीमित परिमाणमा उत्पादन हुने क्राफ्ट बियर तथा माइक्रो ब्रुअरी व्यवसाय स्पष्ट नियामकीय संरचनाभित्र नरहेको गुनासो रहँदै आएको थियो। नयाँ व्यवस्थासँगै यस्ता उद्योगले कानुनी मान्यता पाउने, नियमनको दायरामा आउने तथा व्यवसाय विस्तारको अवसर प्राप्त गर्ने अपेक्षा गरिएको छ।
उद्योग क्षेत्रका जानकारहरूका अनुसार यो नीतिले नेपाली मदिरा उद्योगलाई थप व्यवस्थित, प्रतिस्पर्धी र निर्यातमुखी बनाउन मद्दत पुग्न सक्छ। विशेषगरी पर्यटन उद्योगसँग जोडिएका क्राफ्ट बियर तथा स्थानीय स्वादमा आधारित मदिरा उत्पादनले अन्तर्राष्ट्रिय बजारमा नयाँ अवसर पाउन सक्ने सम्भावना रहेको उनीहरूको भनाइ छ।
सरकारको यो घोषणालाई नेपाली मदिरालाई ‘ब्राण्ड नेपाल’ का रूपमा विश्व बजारमा स्थापित गर्ने प्रारम्भिक प्रयासका रूपमा समेत हेरिएको छ।
.png)
.jpeg)
