नेपाल हाईड्रो डेभलोपरको खुद नाफा ३२.२६% ले वृद्धि, वित्त खर्च ५०.७५% ले घट्यो

काठमाण्डौ । नेपाल हाईड्रो डेभलोपर लिमिटेडको आम्दानी र नाफामा सामान्य बढेको छ । कम्पनीले चालु आवको तेस्रो त्रैमाससम्म ४ करोड ९८ लाख रुपैयाँ खुद नाफा कमाएको छ । यो रकम अघिल्लो आवको सोही अवधिको तुलनामा ३२.२६ प्रतिशतले बढी हो ।  

अघिल्लो आवको सोही अवधिसम्म भने कम्पनीले ३ करोड ७६ लाख रुपैयाँ खुद नाफा आर्जन गरेको थियो ।  

कम्पनीले ९ करोड २ लाख रुपैयाँबराबरको विद्युत बिक्री आम्दानी गरेको छ । यो रकम अघिल्लो आवको तुलनामा १०.७१ प्रतिशतले बढी हो । कम्पनीको सञ्चालन मुनाफा ७ करोड ६९ लाख र अन्य आम्दानी ११ लाख रुपैयाँ रहेको छ ।  

कम्पनीको वित्त खर्च ५०.७५ प्रतिशतले घटेको छ । अघिल्लो आवमा १ करोड ६ लाख रुपैयाँ रहेको वित्त खर्च घटेर ५२ लाख ३२ हजार रुपैयाँमा सीमित बनेको छ । यस्तै कम्पनीको प्रशासनिक,बिक्री तथा वितरण खर्च २० लाख २ हजारबाट बढेर २४ लाख ८८ हजार रुपैयाँ कायम भएको छ ।  

कम्पनीको रिजर्भको आकार ८ करोड ९ लाख रुपैयाँ रहेको छ । अघिल्लो आवमा भने कम्पनीको रिजर्भ कोषमा ५ करोड ८८ लाख रुपैयाँ थियो । कम्पनीको चुक्तापूँजी ३८ करोड ८१ लाख रुपैयाँ रहेको छ ।  

समीक्षा अवधिसम्म कम्पनीको प्रतिसेयर आम्दानी(ईपीएस)१७.११ रुपैयाँ, प्रतिसेयर नेटवर्थ १२०.८४ रुपैयाँ, मूल्य आम्दानी अनुपात ४५.४९ गुणा र तरलता अनुपात १.३० प्रतिशत कायम भएको छ ।