सानिगाड हाइड्रोको आईपीओमा आवेदन दिने म्याद थप

काठमाण्डौ । सानिगाड हाइड्रो लिमिटेडले आयोजना प्रभावित क्षेत्रका स्थानीय बासिन्दाका लागि निष्कासन गरेको आईपीओमा आवेदन दिने म्याद थप गरिएको छ । कम्पनीले गत चैत ८ गतेदेखि निष्कासन गरेको आईपीओमा आवेदन दिने म्याद थप गरिएको हो ।  

कम्पनीले आयोजना प्रभावित क्षेत्रका स्थानिय बासिन्दका लागि २८ लाख ५० हजार कित्ता सेयर निष्कासन गरेको थियो । उक्त आईपीओमा चैत २२ गतेसम्म आवेदन दिन सकिने व्यवस्था गरिएको थियो । तर मागबमोजिम आवेदन नपरेकाले उक्त आईपीओमा अब वैशाख ७ गतेसम्म आवेदन दिन सकिने व्यवस्था गरिएको छ ।  

मागभन्दा बढी आवेदन प्राप्त भएमा भने वैशाख ७ गते अगावै आईपीओ निष्कासन बन्द गरिने कम्पनीले जनाएको छ ।  

आयोजना प्रभावितलाई छुट्याइएको कुल आईपीओमध्ये १८ लाख ५२ हजार ५०० कित्ता आयोजना अति प्रभावित क्षेत्र अर्थात बझाङको बुंगल नगरपालिका वडा नम्बर १, २ र ४ का स्थानीय बासिन्दाले र ९ लाख ९७ हजार ५०० कित्ता प्रभावित क्षेत्र अर्थात बुंगल नगरपालिकाको वडा नम्बर ३, ५, ६, ७, ८, ९, १० र ११ का स्थानीय बासिन्दाले आवेदन दिन सक्नेछन् ।

उक्त आईपीओमा आवेदन दिंदा न्यूनतम १० कित्ता र अधिकतम २० हजार कित्तासम्म माग गर्न सकिनेछ ।  

आयोजना प्रभावितले बुंगल नगरपालिकास्थित कम्पनीको पावर हाउस, लक्ष्मी लक्ष्मी सनराइज बैंकको चैनपुर शाखा कार्यालयका साथै ग्लोबल आइएमई बैंक, राष्ट्रिय वाणिज्य बैंक र कृषि विकास बैंकको बझाङस्थित शाखा कार्यालयमा आवेदन फाराम प्राप्त गर्न र बुझाउन सक्नेछन् ।

कम्पनीको धितोपत्र निष्काशन तथा बिक्री प्रबन्धकमा लक्ष्मी सनराइज क्यापिटल लिमिटेड रहेको छ ।