रास्वपामा उम्मेदवार बन्न ‘क्यान्डिडेट क्लब’ र ‘लिडरसिप एकेडेमी’ अनिवार्य

काठमाण्डौं, आगामी स्थानीय तह निर्वाचनमा राष्ट्रिय स्वतन्त्र पार्टी (रास्वपा) बाट उम्मेदवार बन्न अब ‘क्यान्डिडेट क्लब’ र ‘लिडरसिप एकेडेमी’ अनिवार्य रूपमा उत्तीर्ण गर्नुपर्ने व्यवस्था गरिएको छ।

पार्टी केन्द्रीय कार्यालय, वनस्थलीमा बसेको सचिवालय बैठकले उम्मेदवार छनोटका लागि यस्तो मापदण्ड तय गरेको जानकारी प्रवक्ता मनिष झाले दिएका छन्।

उनका अनुसार, चुनावमा उम्मेदवार बन्न इच्छुक पार्टी सदस्यले तोकिएको आन्तरिक परीक्षा तथा प्रशिक्षण कार्यक्रम अनिवार्य रूपमा पूरा गर्नुपर्नेछ।

बैठकमा उम्मेदवार छनोटसँग सम्बन्धित विषयसँगै अन्य संगठनात्मक एजेन्डामाथि पनि छलफल भएको थियो।

आगामी निर्वाचन र नेतृत्व चयनलाई ध्यानमा राखेर तयार गरिएका विभिन्न कार्यविधिहरू पनि बैठकको कार्यसूचीमा समावेश गरिएको थियो।

 

सचिवालय बैठकमा ‘स्थानीय तह उम्मेदवार छनोट रूपरेखा–२०८३’ र ‘महाधिवेशन कार्यविधि–२०८३’ का विषयमा छलफल जारी रहेको छ।  

साथै ‘संसदीय दलको विधान संशोधन’ लगायत अन्य समसामयिक विषयहरूमा पनि छलफल भइरहेको प्रवक्ता झाले जानकारी दिएका छन्।