“पुराना कानून खारेज गरौं, प्रविधिमैत्री नयाँ व्यवस्था ल्याऔं” : सभामुख अर्याल

काठमाण्डौं । सभामुख डोलप्रसाद अर्यालले समयानुकूल, प्रविधिमैत्री र जनजीवनसँग प्रत्यक्ष जोडिने कानून निर्माणमा जोड दिएका छन् ।  

पूर्वसांसद मञ्चले आयोजना गरेको कार्यक्रममा बोल्दै उनले पुराना तथा अप्रासंगिक कानूनलाई संशोधन वा खारेज गरेर नयाँ सोचअनुसारको कानूनी संरचना तयार गर्नुपर्ने आवश्यकता औंल्याए ।

उनले वर्तमान कानून निर्माण प्रक्रियामा व्यवहारिक पक्ष कमजोर रहेको उल्लेख गर्दै विशेषगरी सवारी चालक अनुमतिपत्र (लाइसेन्स) प्रणालीप्रति असन्तुष्टि व्यक्त गरे ।

लिखित परीक्षामा असफल भएपछि पुनः परीक्षा दिन तीन महिना पर्खिनुपर्ने व्यवस्था अव्यवहारिक भएको र यसले सर्वसाधारणको दैनिकी तथा रोजगारीमा असर पुर्‍याउने उनको भनाइ थियो ।

सभामुख अर्यालले दुई पाङ्ग्रे सवारीका लागि १८ वर्ष र चार पाङ्ग्रे सवारीका लागि २१ वर्ष उमेर सीमा तोकिएको व्यवस्थामाथि पनि प्रश्न उठाए ।  

कानून बनाउँदा सरोकारवाला र प्रयोगकर्तासँग पर्याप्त परामर्श नहुने प्रवृत्ति रहेको भन्दै उनले कार्यपालिका, व्यवस्थापिका र न्यायपालिकाबीच प्रभावकारी समन्वय आवश्यक रहेको बताए ।

उनले अनुभवी अग्रज पुस्ता, ऊर्जाशील वर्तमान पुस्ता र प्रविधिमा दक्ष नयाँ पुस्ताबीच सहकार्य हुन सके मात्रै देशलाई समृद्ध र नागरिकले चाहेजस्तो बनाउन सकिने धारणा राखे ।