प्रधानमन्त्रीले विकास साझेदारी र लगानीबारे इयु प्रतिनिधिसँग संवाद गर्ने

काठमाण्डौं । प्रधानमन्त्री वालेन्द्र शाहले नेपालस्थित युरोपेली संघ (इयु) सदस्य राष्ट्रका गैरआवासीय राजदूत तथा कूटनीतिक नियोग प्रमुखहरूसँग मंगलबार सामूहिक भेटवार्ता गर्ने भएका छन् ।

यो भेटलाई नेपालको कूटनीतिक सम्बन्ध विस्तार र अन्तर्राष्ट्रिय साझेदारी सुदृढीकरणका दृष्टिले महत्वपूर्ण मानिएको छ ।

प्रधानमन्त्री तथा मन्त्रिपरिषद्को कार्यालयका अनुसार भेटघाट आज बिहान ११:३० बजे सिंहदरबारस्थित कार्यालयमा हुने तय भएको छ ।  

उच्चस्तरीय कूटनीतिक छलफलमार्फत नेपाल–युरोपेली संघ सम्बन्धलाई थप व्यावहारिक र परिणाममुखी बनाउने अपेक्षा गरिएको छ ।

प्रधानमन्त्री शाहले छलफलका क्रममा नेपालका वर्तमान राष्ट्रिय प्राथमिकता, आर्थिक सुधारका रणनीति तथा सुशासन प्रवर्द्धनका सरकारी प्रयासबारे विस्तृत जानकारी दिनेछन् ।  

साथै, विकास साझेदारी, लगानी प्रवर्द्धन, व्यापार विस्तार र वातावरणीय चुनौतीजस्ता विषयमा पनि विचार आदान–प्रदान हुने बताइएको छ ।

प्रधानमन्त्रीका प्रेस तथा अनुसन्धान विज्ञ दीपा दाहालका अनुसार भेटमा विशेषगरी ऊर्जा, पूर्वाधार विकास, जलवायु परिवर्तन र मानव विकाससम्बन्धी सहकार्यका सम्भावनाबारे समेत छलफल हुने कार्यसूची रहेको छ ।

यसअघि चैत २५ गते पनि प्रधानमन्त्री शाहले नेपालमा कार्यरत विभिन्न देशका राजदूत तथा कूटनीतिक नियोग प्रमुखहरूसँग सामूहिक भेट गरेका थिए ।  

उक्त अवसरमा उनीहरूले नेपालको नीतिगत दिशाबारे जिज्ञासा राखेका थिए ।

त्यतिबेला प्रधानमन्त्री शाहले आफ्नो सरकारको प्राथमिकता सुशासन सुधार, दिगो आर्थिक वृद्धि तथा सन्तुलित र व्यवहारिक वैदेशिक सम्बन्ध कायम गर्नु रहेको स्पष्ट पारेका थिए ।