समाज लघुवित्त: खेलाडीले सेयरमूल्य अचाक्ली बढाए, तर बढेन प्रमुख वित्तीय सूचकको चमक

BANKING
सोमबार, भाद्र ३,२०८१ 14:17:49

काठमाण्डौ । अपरेटरहरु छिरेपछि अत्यन्त कमजोर कम्पनी र प्रमुख वित्तीय सूचकहरु समेत अत्यन्त खराब रहेका कम्पनीहरुको सेयरभाउ रकेटको गतिमा कसरी उड्छ भन्ने एउटा उदाहरण बनेको छ समाज लघुवित्त ।

यो कम्पनी एक वर्षको अवधिमा केही खेलाडीहरुले कर्नरिंग गरी सबैभन्दा बढी मूल्य बढाइएको कम्पनी समेत हो ।

समाज लघुवित्तको दोश्रो बजार मूल्य प्रतिकित्ता ६७ रुपैयाँ हुँदादेखि नै सेयर बजारमा बेला बेला आन्दोलन गर्ने लगानीकर्ताको एउटा संगठनका नेताहरुदेखि केही ब्रोकरहरु मिलेर चलखेल सुरु गरेका थिए ।

उनीहरुले यो कम्पनीको सेयर कर्नरिंग गर्दै मूल्य प्रतिकित्ता ३५०० माथि पुर्याइसकेका छन् । अहिले भने समाज लघुवित्तको दोश्रो बजार सेयरमूल्य केही घटी प्रतिकित्ता २ हजार ७०० हाराहारीमा कारोबार भइरहेको छ ।

यो कम्पनीको सेयरमूल्य जसरी बढाइयो, त्यसलाई पुष्टि गर्ने कम्पनीको न वित्तीय सूचकहरु बलिया छन्, न कुनै सुखद समाचार नै । केही खेलाडी पसे र सुनियोजित रुपमा यो मूल्य बढाई एकवर्षअघि प्रतिकित्ता ६७ रुपैयाँ रहेको सेयर ३५०० माथि भिडाएर कुस्त कमाई उम्किए ।

कुल २ करोड २८ लाख चुक्तापूँजी भएको यो कम्पनीको २ लाख २८ हजार ५०० कित्ता सेयर मात्र नेप्सेमा सूचीकृत छ । थोरै कित्ता भएकै कारण यो कम्पनीले खेलाडीहरुले चाहेअनुसार खेलाइरहेको देखिन्छ ।

निकै माथि माथि पुगेर समाज लघुवित्तको सेयरकित्ता खाने कतिपयले यो कम्पनीको चौथो त्रैमासको वित्तीय विवरण केही सुखद आउने सोचेका थिए । तर, ठीक उल्टो समाज लघुवित्तको आर्थिक वर्ष २०८०-८१ को चौथो त्रैमाससम्मको रिपोर्ट निराशाजनक रहन पुगेको छ ।

चौथो त्रैमाससम्ममा कम्पनीको खूद नाफा ५१ लाख ३० हजार रुपैयाँमा सीमित बन्न पुगेको छ । अघिल्लो वर्षको यही अवधिसम्म ७५ लाख ८२ हजार खूद नाफा थियो ।

अघिल्लो वर्ष ७९ लाख ५६ हजार रुपैयाँ रहेको सञ्चालन घाटा बढेर यो वर्ष २ करोड ३० लाख माथि पुगेको छ।

अघिल्लो वर्ष यही अवधिसम्म १ करोड ९३ लाख रुपैयाँमा सीमित खूद ब्याज आम्दानीतर्फ भने सामान्य बढोत्तरी भई २ करोड २ लाख पुगेको छ । प्रमुख आम्दानीको रुपमा रहेको खूद ब्याज आम्दानी बढे पनि सम्भावित जोखिम व्यवस्थापनका लागि छुट्याइने रकम गत वर्षको भन्दा ह्वात्तै बढ्दा नाफा प्रभावि हुन पुगेको देखिन्छ । अघिल्लो वर्ष कम्पनीले जोखिम व्यवस्थापनका लागि १ करोड ५५ लाख विनियोजन गरेकोमा त्यो बढेर यो वर्ष ३ करोड ११ लाख रुपैयाँ पुगेको छ ।

अघिल्लो वर्ष ४.७८ प्रतिशतको अनुपातमा रहेको खराब कर्जा बढेर ४.८२ प्रतिशत पुगेको छ भने वार्षिकमा प्रतिसेयर आम्दानी २२.४५ रुपैयाँ रहेको छ । कम्पनीको प्रतिसेयर नेटवर्थ चाहिँ रु.२२९.९७ रुपैयाँ कायम भएको देखिन्छ ।