एनआईसी एशिया लघुवित्तले डाक्यो साधारण सभा, यस्ता छन् प्रस्ताव

काठमाण्डौ । एनआईसी एशिया लघुवित्त वित्तीय संस्था लिमिटेडले आगामी चैत ८ गते साधारण सभा आयोजना गर्ने भएको छ । संस्थाको फागुन ११ गते सम्पन्न सञ्चालक समितिको बैठकले धरानमा रहेको गोर्खा होटलमा बिहान ९ बजेदेखि सभा आयोजना गर्ने निर्णय गरेको हो ।  

सभामा संस्थापक सेयरलाई सर्वसाधारण सेयरमा परिणत गर्ने, (हाललाई साविक स्वदेशी लघुवित्त वित्तीय संस्था लिमिटेडका संस्थापकहरु मात्र योग्य रहेको) सेयर परिणत गरे पश्चात् कायम हुन आउने समूहगत सेयर संरचना अनुसार संस्थाको समूहगत सेयर स्वामित्व संरचना परिवर्तन गर्ने र संस्थाको प्रबन्धपत्र र नियमावलीमा समसामयिक थप/संशोधन गर्ने विशेष प्रस्ताव पारित गरिनेछ ।  

यस्तै, प्रबन्धपत्र र नियमावली संशोधन स्वीकृतिको क्रममा नियमनकारी निकायहरुबाट कुनै फेरबदल, थपघट तथा संशोधन गर्न निर्देशन वा सुझाव भएमा सोही बमोजिम गर्न सञ्चालक समितिलाई वा सञ्चालक समितिले तोकेको पदाधिकारीलाई अख्तियारी प्रत्यायोजन गर्ने, आर्थिक वर्ष २०८०/८१ को सञ्चालक समितिको प्रतिवेदन पारित गर्ने, लेखापरीक्षकको प्रतिवेदन सहित आर्थिक वर्ष २०८०/८१ को वासलात, नाफा नोक्सान हिसाब तथा नगद प्रवाह विवरण लगायतका वार्षिक वित्तीय विवरणहरु उपर छलफल गरी स्वीकृत गर्ने प्रस्ताव समेत पारित गरिनेछ ।  

सभामा लेखापरीक्षण समितिको सिफारिस बमोजिम आर्थिक वर्ष २०८१/८२ का लागि बाह्य लेखापरीक्षक नियुक्त गर्ने र निजको पारिश्रमिक तोक्ने प्रस्ताव पारित हुनेछ ।  

साधारण सभा प्रयोजनका लागि संस्थाले फागुन २८ गते एक दिनका लागि बुक क्लोज गर्ने निर्णय गरेको छ । यसर्थ फागुन २७ गतेसम्म नेप्सेमा कारोबार भई कायम भएका सेयरधनीहरु मात्रै संस्थाको सभामा सहभागी हुन योग्य हुनेछन् ।