दीपेन्द्र अग्रवालको ३३ करोड बढी नदिने ब्रोकरविरुद्ध पनि पक्राउ पुर्जी, ‘उल्टो खेल खेलियो !’

काठमाण्डौ । सेयर लगानीकर्ता दीपेन्द्र अग्रवालको ३३ करोड बढी पैसा नदिने ब्रोकर कम्पनीका सञ्चालक तथा उच्चपदस्थ कर्मचारीविरुद्ध समेत पक्राउ पुर्जी जारी भएको छ ।  

ब्रोकर कम्पनी सिप्रवी सेक्युरिटिज प्रालिका अध्यक्ष, रविराज भट्टराई, महाप्रबन्धक जयन्त श्रीवास्तव, प्रबन्ध निर्देशक सतिषकुमार श्रेष्ठ र सिनियर अधिकृत कविराज न्यौपानेविरुद्ध समेत पक्राउ पुर्जी जारी भएको हो ।

भट्टराई, श्रीवास्तव, श्रेष्ठ र न्यौपानेविरुद्ध २०८२ असार ९ गते नै पक्राउ पूर्जी जारी भए पनि उनीहरु चारैजना हालसम्म फरार रहेका छन् । 

सेयर लगानीकर्ता दीपेन्द्र अग्रवालले सो ब्रोकर कम्पनीले आफूलाई तिर्नुपर्ने ३३ करोड ७३ लाख २३ हजारमध्ये ९ करोड ७३ लाख २३ हजार धोकापूर्ण ढंगले नदिएको भन्दै प्रहरीमा उजुरी दिएका थिए । अग्रवालको सोही उजुरीका आधारमा भट्टराई, श्रीवास्तव, श्रेष्ठ र न्यौपानेविरुद्ध पक्राउ पूर्जी जारी भएको थियो । यसको सुइँको पाएलगत्तै चारैजना फरार छन् ।  

आफ्नो फसेको पैसा उठाउने मनशायले ब्रोकरका सञ्चालकविरुद्ध उजुरी दिएर पक्राउ पुर्जी जारी गराएका अग्रवाललाई प्रहरीले सोमबार दिउँसो टोखाबाट नियन्त्रणमा लिएको थियो । दीपेन्द्र अग्रवालको पक्राउ प्रकरण समेत सोही घटनासँग जोडिएको देखिन्छ ।  

खासमा दीपेन्द्र अग्रवाल दाईले सिप्रवीबाट ३३ करोड ७३ लाख २३ हजार  रकम लिनुपर्ने हो । त्यसमध्ये दिनेश शाहबाट हामीलाई केही रकम आएपछि बाँकी रहेको ९ करोड ७३ लाख २३ हजार मात्र बाँकी रहेको र त्यही पैसा धोकापूर्ण ढंगले नदिइएको भनेर उजुरी दर्ता भएको थियो । अग्रवालका एक सहयोगीले बिजशालासँग भने ः तर सिप्रवीले भनेका आधारमा दिनेश र नीतिन शाहले दीपेन्द्र दाईलाई हालिदिएको त्यही करिब २४ करोड रुपैयाँको विषयलाई श्रीवास्तव र श्रेष्ठले खेल खेली ट्वीस्ट गरिदिएपछि उनीहरुले उचालेकै भरमा शाहले उजुरी दिई दीपेन्द्र दाईलाई पक्राउ गरेको हो । अब हामीले सिप्रवीविरुद्ध पनि ३३ करोड ७३ लाख २३ हजार रकम नै लिन बाँकी रहेको नयाँ उजुरी दिन्छौं । हामीलाई हाम्रो पूरा पैसा चाहियो ।

सिप्रवि सेक्युरिटिजको खातामा दीपेन्द्र अग्रवालले कुल ३३ करोड ७३ लाख २३ हजार एक सय ८६ रुपैयाँ सापटीको रुपमा हालिदिएका थिए । त्यो पैसा उसले सेटलमेन्ट गाह्रो भयो भनेर सापटी मागेको कारण हालिदिएको अग्रवालका सहयोगीको दाबी छ । 

सिप्रवीले त्यो पैसा आफूहरुसँगै काम गर्ने नीतिन शाह र दिनेश शाहको लेजरमा एडजस्ट गरिदिएको र त्यसपछि बाँकी रहेको पैसा नीतिन र दिनेशको खातामा राखिदिएको सहयोगीले बताए । तर त्यो पैसा फेरि घुमाएर नीतिन र दिनेशले २३ करोड ९९ हजार ९ सय रुपैयाँ दीपेन्द्र, ज्योति र मित्त मुरारकाको एकाउन्टमा हालिदिए। तर हामीले दिएको त ३३ करोड हो।  पैसा आयो करिब २४ करोड । अनि बाकी रकम ९ करोड ७३ लाख रुपैयाँ माग्दा ब्रोकरले त्यो पैसा नीतिनलाई दिने हो तपाइलाई दिने होइन भनेर निहुँ खोजेको अग्रवालका सहयोगी बताउँछन् । त्यसपछि चाहिँ दीपेन्द्रले ब्रोकरविरुद्ध उजुरी हालेका उनको भनाई छ । त्यही आधारमा श्रीवास्तव र श्रेष्ठविरुद्ध पक्राउ पूर्जी जारी भएको हो ।  

दीपेन्द्र अग्रवाल पक्राउ पर्नुको कारण उल्लेख गर्दै उनका सहयोगीले भने ः खासमा हामीलाई पैसा नीतिन र दिनेशको खाताबाट आएको थियो। हाम्रो फसेको पैसामध्ये करिब २४ करोड उनीहरुको खाताबाट ब्रोकरले हालिदिएको हामीले ठान्यौं । तर अहिले आएर उल्टै सिप्रवीको इशारामा नीतिन र दिनेशले दीपेन्द्र दाईविरुद्ध धोका र जालसाजीको उजुरी हालिदिए । त्यसकै आधारमा दाई पक्राउ पर्नुभयो ।  

ती सहयोगीले दीपेन्द्रले कुनै गल्ती नगरेको, बरु उल्टै सिप्रवीले ठगी गरेकोले त्यसबाट बच्न उल्टो खेल खेलिएको दाबी समेत गरे।