रिलायन्सको आईपीओ स्क्यामविरुद्ध प्रम कार्यालयदेखि अर्थमन्त्री हुँदै अख्तियारसम्म उजुरीका चाङ

काठमाण्डौ । रिलायन्स स्पिनिङ मिल्सको विवादास्पद आईपीओ रोक्न तथा यो प्रकरणमा भएको नीतिगत भ्रष्टाचार र मिलेमतोको निश्पक्ष छानबिन गरी लगानीकर्ता ठगिनबाट जोगाइदिन माग गर्दै विभिन्न निकायहरुमा उजुरीका चाङ लागेका छन् ।  

सेयर बजारका लगानीकर्ता, विश्लेषक, लगानीकर्ताको पक्षमा काम गर्ने अभियन्ता लगायत दर्जन बढीबाट विभिन्न निकायमा आइतबार साँझसम्म बग्रेल्ती उजुरीहरु परेका सम्बद्ध निकायहरुले जानकारी दिएका छन् । 

नेपाल सरकारअन्तर्गतको प्रधानमन्त्री कार्यालयमा मात्रै यस सम्बन्धी कम्तीमा ६ वटा उजुरी परेका प्रधानमन्त्रीको स्वकीय सचिवालयका एक अधिकारीले जानकारी दिए ।  

यस्तै, अर्थमन्त्रालयमा समेत केही उजुरी परेका छन् । केही उजुरी मेलबाट सोझै अर्थमन्त्रीलाई पठाइएको समेत उजुरीकर्ताहरुले जानकारी दिएका छन् ।  

यस्तै, लगानीकर्ताहरुको भिन्ना–भिन्नै समूहले केही उजुरी प्रहरीको केन्द्रीय अनुसन्धान ब्यूरो(सीआईबी)मा समेत गरेका छन् । सीआईबीले वित्तीय क्षेत्रमा हुने अपराधविरुद्ध पछिल्लो समय प्रभावकारी अपरेशन चलाउँदै आएको छ ।  

५ वटाभन्दा बढी उजुरी अख्तियार दुरुपयोग अनुसन्धान आयोगमा परेका छन् । अख्तियारमा परेका उजुरीहरुमध्ये अधिकांशमा रिलायन्सको आईपीओ अदालतको आदेशको अपव्याख्या गर्दै नियोजित ढंगले महङ्गो मूल्यमा भिराउने प्रयास भएको भन्दै त्यसबाट लगानीकर्ता ठगिन सक्ने जोखिम देखिएको र यो प्रकरणमा शंकास्पद भूमिका निर्वाह गरेको भन्दैसेबोनका अध्यक्षमाथि समेत छानबिन र कारबाहीको माग गरिएको छ । 

अन्य निकायमा परेका उजुरीहरुमा रिलायन्सले पावर र पैसाको प्रयोग गरेर दुई वर्षअघिको विवरणका आधारमा तोकिएको मूल्यमा आईपीओ निश्कासन गर्न लागेको र यो सुनियोजित स्क्याम रहेको भन्दै सर्वसाधारण जनतालाई ठगिनबाट जोगाइदिन आग्रह गरिएको छ ।  

यस्तै, लगानीकर्ताहरुबाट परेको उजुरीमा भने रिलायन्सको आईपीओको पछिल्लो वित्तीय विवरणलाई केस्रा–केस्रा केलाएर नयाँ कटअफ मूल्य तोक्न र सोही आधारमा मात्र आईपीओ निश्कासन गर्ने व्यवस्था गरिदिन भनिएको छ ।