अमच्याम नेपाल र परराष्ट्र मन्त्रीबीच आर्थिक सहकार्य सुदृढीकरणबारे छलफल

काठमाण्डौ । अमेरिकन चेम्बर अफ कमर्स इन नेपाल (अमच्याम नेपाल) ले परराष्ट्र मन्त्रीसँग महत्वपूर्ण भेटवार्ता गर्दै नेपाल–अमेरिका व्यापारिक सम्बन्ध विस्तारमार्फत देशको आर्थिक रूपान्तरणमा सहयोग गर्ने आफ्नो प्रतिबद्धता पुनः दोहोर्‍याएको छ।

भेटवार्ताका क्रममा अमच्याम नेपालले आफूलाई नेपाल सरकारको रणनीतिक साझेदारका रूपमा प्रस्तुत गर्दै अमेरिकी व्यवसायहरूको लगानी, नवप्रवर्तन र दिगो आर्थिक वृद्धिमा महत्वपूर्ण भूमिका रहेको उल्लेख गरेको थियो। साथै, द्विपक्षीय व्यापार तथा लगानीका लागि अनुकूल वातावरण सिर्जना गर्दै आर्थिक कूटनीति सुदृढ गर्ने विषयमा छलफल केन्द्रित रहेको थियो।

परराष्ट्र मन्त्रीले नेपाल–अमेरिका आर्थिक सहकार्यलाई अझ प्रभावकारी बनाउने उद्देश्यले प्रमुख चुनौती, अवसर र कार्यान्वयनयोग्य योजनासहितको विस्तृत रूपरेखा तयार गर्न अमच्याम नेपाललाई सुझाव दिएका छन्। साथै, मन्त्रीले आफ्नो आसन्न अमेरिका भ्रमणपछि थप रणनीतिक सहकार्य र समन्वयका लागि पुनः भेटघाट गर्ने इच्छा व्यक्त गरेका छन्।

छलफलका क्रममा रोजगारी सिर्जना मुख्य प्राथमिकताका रूपमा उठेको थियो। निजी क्षेत्रको सक्रिय सहभागितामार्फत ठूलो परिमाणमा रोजगारी सिर्जना गर्ने राष्ट्रिय लक्ष्यमा योगदान पुर्‍याउन अमच्याम नेपालले लगानी प्रवर्द्धन तथा प्रभावकारी आर्थिक पहलहरूमा सहयोग गर्ने प्रतिबद्धता जनाएको छ।

यसैबीच, नेपाल–अमेरिका द्विपक्षीय हितसँग सम्बन्धित आर्थिक तथा नीतिगत मञ्चहरूमा संरचित रूपमा निजी क्षेत्रको सहभागिता सुनिश्चित गर्न अमच्याम नेपालले प्रतिनिधित्वको औपचारिक माग गरेको छ। मन्त्रालयले ‘ब्रान्ड नेपाल’ लाई अन्तर्राष्ट्रिय स्तरमा प्रवर्द्धन गर्दै नेपाललाई लगानी र नवप्रवर्तनको आकर्षक गन्तव्यका रूपमा स्थापित गर्ने लक्ष्य रहेको उल्लेख गरेको छ, जसमा अमच्याम नेपालले आफ्नो अन्तर्राष्ट्रिय सञ्जालमार्फत सहयोग गर्ने जनाएको छ।

अमेरिकी कम्पनीहरूका लागि स्थिर नीतिगत वातावरण, समयमै निर्णय प्रक्रिया तथा समान अवसर सुनिश्चित गर्नु लगानीकर्ता विश्वास अभिवृद्धि र प्रत्यक्ष वैदेशिक लगानी आकर्षणका लागि अत्यावश्यक रहेकोमा दुवै पक्ष सहमत भएका छन्।

दुवै पक्षले सरकारको सुधार एजेन्डा अनुरूप र नेपालको आर्थिक अवस्था सुदृढ पार्ने प्रयाससँग सहकार्य गर्दै सकारात्मक तथा परिणाममुखी साझेदारीका लागि आशावादी रहेको जनाएका छन्।

उक्त भेटमा अमच्याम नेपालका अध्यक्ष कैलाश बिजयानन्द, पूर्व अध्यक्ष निर्मल काजी श्रेष्ठ, संस्थापक अध्यक्ष अजित विक्रम शाह, कोषाध्यक्ष स्नेह राजभण्डारी, मनीष थापा, सचिन करणजित तथा कार्यकारी निर्देशक अमिर आर थापा सहभागी थिए।