नेप्सेद्वारा सिडिएससीबाट प्रवीन पन्दाकलाई फिर्ता बोलाउने निर्णय

काठमाण्डौ । सिडिएस एण्ड क्लियरिङ लिमीटेडमा प्रबन्ध निर्देशकको रुपमा कार्यरत प्रवीन पन्दाकलाई नेपाल स्टक एक्सचेञ्ज लिमीटेड-नेप्से)ले फिर्ता बोलाएको छ ।  

नेप्सको शुक्रबार बसेको सञ्चालक समितिको बैठकले उनलाई सिडिएससीबाट नेप्सेमै फिर्ता बोलाउने निर्णय गरेको हो । 

नेप्सेमा सूचिकृत कम्पनीहरुलाई दिइने अन्तर्राष्ट्रिय पहिचान संकेत(आईजीन)को विषयमा लामो समयदेखि केही उच्च घरानाहरुबाट सिडिएससीको नेतृत्व फेर्न दवाब थियो । कतिपय औद्योगिक घरानाहरुले सिंगल आईजीनको फाइदा उठाएर लकइनको अवधिमै संस्थापक सेयर बिक्री गर्नेजस्तो गैरकानूनी काम भएपछि यो विकृति अन्त्यका लागि पन्दाकले दोहोरो आईजीन लागू गर्नुपर्ने पक्षमा लडेकी थिइन् ।  

उनले दोहोरो आईजीनको व्यवस्था गरी सिंगल आईजीनको नाममा फट्याईं गरिरहेका संस्थापकहरुलाई रोक्नुपर्ने र दोहोरो आईजीन हुँदा सर्वसाधारण लगानीकर्ताहरु थप ठगिनबाट जोगिने भन्दै निर्देशिका नै परिवर्तन गर्ने अन्तिम तयारी थियो । सिडिएससीबाट दोहोरो आईजीनको व्यवस्थासहित बजारको विकृति अन्त्यका लागि निर्देशिका संसोधनसहित पारितका लागि धितोपत्र बोर्डमा पठाइएको थियो । बोर्ड नेतृत्वले लामो समयसम्म स्वार्थ समूहहरुको दवाबका कारण त्यसलाई अगाडि नबढाई अलपत्र पारेर राखिरहेकै समयमा नेप्सेको सञ्चालक समितिले पन्दाकलाई फिर्ता बोलाउने निर्णय गरेको हो । 

नेप्सेस्थित उच्च स्रोतका अनुसार पन्दाकलाई सिडिएससीबाट हटाउनका लागि केही व्यापारिक घरानाहरु चलखेल गरेका थिए । प्रधानमन्त्री बालेन्द्र शाहको सचिवालयका केही व्यक्तिले यसमा ती घरानाहरुलाई साथ दिंदै केही दिनअघिदेखि तारन्तार दवाब समेत सिर्जना गरेका थिए । प्रधानमन्त्री कार्यालयबाटै दवाब आएपछि नेप्सेले सञ्चालक समिति बोलाएर पन्दाकलाई फिर्ता बोलाउने निर्णय गरिएको स्रोतको भनाई छ । प्रधानमन्त्री कार्यालयका कुन सदस्यले यस्तो दवाब दिए भन्ने विषयमा पात्रको नाम र सूचना आए पनि यसको स्वतन्त्र पुष्टि भने यो समाचार तयार पार्दासम्म हामीले गर्न सकेका छैनौं ।  

प्रवीनलाई सिडिएसीबाट फिर्ता बोलाउने निर्णयमा अर्थमन्त्रालयको भूमिका भने हाम्रो खोजबिनको क्रममा पुष्टि भएन ।  

कतिपयले भने प्रवीन पन्दाकलाई हिरासतमा रहेका व्यवसायी दीपक भट्टसँग समेत जोडेर समेत प्रचार गरेका थिए । ती आरोपहरुमा पन्दाकले भने आपत्ति जनाउँदै आएकी थिइन् । आफूले बजारको विकृति अन्त्य र ठूलाले गर्ने फट्याईंलाई रोक्नका लागि डबल आईजीनसम्बन्धी व्यवस्था संसोधनका लागि अगाडि बढाउँदा आधारहीन आरोप लगाएको भन्दै उनले निकटस्थहरुसँग गुनासो गर्ने गरेकी थिइन् ।  

नेप्सेले फिर्ता बोलाउने निर्णय गरेपछि सो विषयमा प्रतिक्रिया लिन खोज्दा भने पन्दाकले फोन रेसपोन्स गरिनन् । म्यासेजबाट मागिएको प्रतिक्रियाको समेत जवाफ आएन ।