साना किसान विकास लघुवित्तको लाभांश क्षमता घट्यो, खुद नाफामा समेत ११.३३% को संकुचन

काठमाण्डौ । साना किसान विकास लघुवित्त वित्तीय संस्था लिमिटेडको लाभांश क्षमतामा ह्रास आएको छ । चालु आवको तेस्रो त्रैमाससम्म संस्थाको लाभांश क्षमता ३१.२७ प्रतिशतमा खुम्चिएको छ । अघिल्लो् आवको सोही अवधिसम्म भने संस्थाको लाभांश क्षमता ३६.१९ प्रतिशत रहेको थियो ।

संस्थाको वितरणयोग्य मुनाफा समेत १ अर्ब ५६ करोड रुपैयाँबाट घटेर १ अर्ब ५४ करोड रुपैयाँमा सीमित बनेको छ ।

यस्तै संस्थाको खुद मुनाफामा समेत गिरावट आएको छ । अघिल्लो आवको तेस्रो त्रैमाससम्म ५४ करोड ५० लाख रुपैयाँ रहेको संस्थाको खुद नाफा ११.३३ प्रतिशतले घटेर ४८ करोड ३२ लाख रुपैयाँमा सीमित बनेको छ ।

संस्थाको खुद ब्याज आम्दानीमा गिरावट आउनु नै नाफा घट्नुको मुख्य कारणको रुपमा रहेको छ । अघिल्लो आवमा १ अर्ब ३९ करोड रुपैयाँ रहेको संस्थाको खुद ब्याज आम्दानी घटेर ९६ करोड ४९ लाखमा खुम्चिएको छ ।

यस्तै सञ्चालन मुनाफा समेत ७९ करोड १७ लाखबाट घटेर ६८ करोड ९८ लाख पुगेको छ । इम्पेयरमेन्ट चार्ज भने १ करोड ७० लाख रुपैयाँले रिर्भसल भएको छ । यो अवधिमा संस्थाको खराब कर्जा अनुपात २.५५ प्रतिशतबाट बढेर ४.१२ प्रतिशत पुगेको छ । कस्ट अफ फण्ड भने ३.५२ प्रतिशतबाट घटेर २.६६ प्रतिशत कायम भएको छ ।

समीक्षा अवधिसम्म संस्थाको प्रतिसेयर आम्दानी(ईपीएस) १३.०८ रुपैयाँ, प्रतिसेयर नेटवर्थ २१८.४० रुपैयाँ, मूल्य आम्दानी अनुपात ५९.०२ गुणा र तरलता अनुपात १५३.२६ प्रतिशत कायम भएको छ ।