यी ५ नयाँ ब्रोकरले टेरेनन् नेप्सेलाई, बाँकी सबैले पठाए आईटी अफिसरको नाम

STOCK MARKET
मंगलवार, बैशाख २३,२०८२ 16:17:40

काठमाण्डौ । नेपाल स्टक एक्सचेञ्जमा दर्ता भएका ९२ वटा ब्रोकरमध्ये ५ वटा नयाँ ब्रोकरले नेप्सेको पत्रलाई लत्याईदिएका छन् । नेपाल स्टक एक्सचेञ्जले वैशाख १५ गते सबै ब्रोकरहरुलाई एक साताको समयावधि दिएर हरेक ब्रोकरबाट २ जना आईटी कर्मचारीको नाम पठाउन निर्देशन दिएको थियो ।

जसमा ८७ वटा ब्रोकरहरुले आफ्ना आईटी अफिसरको नाम पठाएको नेप्सेका प्रवक्ता मुराहरी पराजूलीले जानकारी दिए । उनका अनुसार हाल नेप्सेलाई ५ वटा बाहेक सबै ब्रोकरहरुले आफ्ना आईटी अफिसरको नाम पठाएका छन् । पराजूलीका अनुसार केही ब्रोकरहरुले आउट सोर्सिङ गरेका पनि हुन सक्छन् । ती अफिसरको नाम के कसरी पठाइएको छ भन्ने विषय नेप्सेले अध्ययन गरिरहेको प्रवक्ता पराजुलीले बताए ।

उनका अनुसार टीएमएसलाई प्रभावकारी बनाउन नेप्सेले आईटीलाई चुस्त दुरुस्त बनाउन खोजेको छ । अहिले बजार सामान्य अवस्थामा रहेता पनि बजारमा चमक आएको बेला टीएमएसले काम नगर्ने समस्या देखिएको छ । टीएमएस नचलेर समस्या आएपछि लामो समयदेखि नेप्सेले ब्रोकरहरुलाई र ब्रोकरहरुले नेप्सेलाई दोषारोपण गर्दै आएका छन् ।

त्यही कारण अब टीएमएसमा कुनै समस्या आई नपरोस र समस्या आए पनि ब्रोकरहरुले नै समस्या समाधान गर्न सकुन् भन्ने अभिप्रायसले नेप्सेले आईटी अफिसरको विषयमा सोधखोज गरेको पराजुलीले प्रतिक्रिया दिए । उनले भने, ‘यसो गरेर हामीले ब्रोकरहरुलाई कुनै असजिलो पार्न खोजेका होइनौ । अहिले भएको ब्यबस्थालाई नै कार्यन्वयन गर्न तर्फ नेप्से लागेको हो ।’