आईपीओ निष्काशनको तयारीमा नेपाल इन्फ्रास्ट्रक्चर इन्भेस्टमेन्ट फण्ड

काठमाण्डौ । नेपाल इन्फ्रास्ट्रक्चर इन्भेस्टमेन्ट फण्ड (एनआईआईएफ) आईपीओ निष्काशनको तयारीमा जुटेको छ । एनआईआईएफ र लक्ष्मी सनराइज क्यापिटल लिमिटेड (एलएस क्यापिटल) बीच एनआईआईएफको प्रारम्भिक सार्वजनिक निष्काशन (आईपीओ)को लागि सल्लाहकार सेवा प्रदान गर्ने सम्झौता भएको छ। 

एलएस क्यापिटलका प्रमुख कार्यकारी अधिकृत विजयलाल श्रेष्ठ र नेपाल पूर्वाधार लगानी कोषका कार्यकारी अध्यक्ष डा मनिष थापाबीच समझदारी पत्रमा हस्ताक्षर भएको छ ।  

ग्लोबल इक्विटी फण्ड लिमिटेडद्वारा स्थापित नेपाल इन्फ्रास्ट्रक्चर इन्भेस्टमेन्ट फण्ड लिमिटेड नेपालको बीमा कम्पनीहरूको लागि स्थायी लगानीको साधन हो। यो कम्पनी कृषि, स्वच्छ ऊर्जा र स्वच्छ प्रविधि, पर्यटन, आईसीटी, स्वास्थ्य हेरचाह, र निर्माणमा केन्द्रित छ। 

यो कम्पनी २०७९ कात्तिक २९ गते दर्ता भएको थियो र कम्पनीले २०७९ माघ ५ गते पहिलो लगानी गरेको थियो। कम्पनीको अधिकृत पूँजी १ अर्ब ५० करोड रुपैयाँ रहेको छ । कम्पनीको जारी पूँजी १ अर्ब २० करोड रहेको र आईपीओको लागि २० सेयर आरक्षित छ।